قصيده للشاعر أنمار شدود

جنّة عدن

احبّك حب جذب ماحابّه انسان
ولاشاله كَلب مجنون ليله

اظل طول العمر ممنون يفلان
الك يالجبت عمري وردلي ريله

طلع بيّه كَلب ينبض ولي السان
ولي روح وجفن سهران ليله

ولي ويالعاشكَين انغام ولحان
وشلت حبّك تبيّن بيّه حيله

عندي ذنوب كومه تكَول دكّان
وريع العمر خلّص باكَي ذيله

جنت جثّه كَبل بجفوف دفّان
وفكرة دنية الحب مستحيله

وتر بالروح جان يريد فنّان
ضربته وطفح بيّه العمر سيله

وشفت الفرح شتت شمل الاحزان
وجه وجكليت تارسلي شليله

كَلّي ابّختك وسوّينه مجان
عشرتي وياك هالمره طويله

وشفت الحظ ضحكلي وكض العنان
وسرجلي ام البخت من بين خيله

وشفت جنّة عدن وياك والوان
قزح ليهن وكَف ونعدل ميلَه

بضحكتك زيح هم كَلبي وميلَه
الحزن جثّه بحفر مامش وميله
منشوفك ينعدل ظهري وميله
وشنّف وستعد واخذ تحيّه