زنجيل زهيري لنائل المظفر

زنجيل زهيري (نائل المظفر)

اليمه بالرمل راس النعامه أندفن
طز بفصول السنه ان ابردن ان دفن
مومثل روحي كطن وهمومي بيها اندفن
...نائل المظفر...
ومحد درف ياطهه في داخلي أشكطعت
وشكد امرني الوكت ياصاح وشكد طعت
وجم جرح كط ونا غركان وشكد طعت
...نائل المظفر...
بس كون اطلع ردت واطلعت كطعت حزن
جاتفني وكتي جتف وحباله بيدي حزن
وزني نصن ظلم نصن حزن راح حزن
...نائل المظفر...
وبين الظلم والحزن نصين انه منفقر
بالمنفه ذبني الوكت كالولي بالمنفه قر
قر من شني تشتكي كتله اشتكي من فقر
...نائل المظفر...
بس انه مو من فقر جنت اشتكي من ظلم
من ظلم لاكن خفت ماكلت انه منظلم
الوكته ظلمه صبح يلكه ضي منظلم
...نائل المظفر...
مليت من ظلمتي والوكت بيه جرم
اجرام ترس السما ماشع عليه جرم
ياربي وين اشتكي والشكوى عدهم جرم
...نائل المظفر...
كال الله لاتشتكي انه الله والشكوى ألي
مو للبغض حيدره ياعبدي والشكولي
وبصوت مؤمن صحت على البغض والشك ولي
...نائل المظفر...
ولي دربنه عدل عن الجدم منزله
باوع لأمامك علي ناصي شكثر منزله
وشكثر سكنو قصر محد على منزله
...نائل المظفر...
بس اني كلبي غرك واستنجدت صاح الي
مامدلي جفه الردي مره ولا صاح الي
ياصاح انجدني وك ماظل كتر صاح الي
...نائل المظفر...
لو روحي كطعت صخر وانته اغركت لنجتك
جا ليش بيها اكسرت وتندمت لأن جتك
ماردتك أذب زرك فوكاي من لنجتك
...نائل المظفر...
ردتك تذبلي حبل بلكت اكض بالطرف
عينك شني ومابجت سده دنت بالطرف
ياجار فازع الك بس اني ألك بالطرف
...نائل المظفر...
وبسيوف اجولك امس واني اوكفتلك درع
المفروض من اغركت ثوبك تدرعه درع
والجيش يفزع عليه بحري ومشات ودرع
...نائل المظفر...
شو جندي واحد اجه ومات الكلب جا ملك
ياكلبي جف الردي مدى جذب جاملك
يدري بضميره يحط فوك البحر جامه لك
...نائل المظفر...
ياحيف كلبي غرك ومحد حبل تف عليه
وياروحي مثل الكلب حرت شنو تفعليه
ولتعاتبين الوكت هذا الوكت تف عليه
...نائل المظفر...
مكلوب مابي عدل حتى الصدك بي جذب
ويادنيا صرتي بحر ومجتوف انه بي جذب
ياروحي عل تهلكه مجبور أنه بي جذب
...نائل المظفر...
والدنيا ظلمه وعصف ومااكدر بجوها ارى
ياحيف غشني الذي عنه كلت جوهره
ثاري انه صوتي صده وهو صدى جوهره
...نائل المظفر...
هسه لا ميزت بين الصدى والفضى
الواطي واطي يظل لوصيت غطه الفضى
وماألفظ اسمه لأن يكبر أذا ألفظه
...نائل المظفر...
ويصير ياصاحبي راس العبد نستله
وبأسمه يتونس لأن اني الي ونسته اله
لا خل يسل خنجره من ايده ثق نستله
...نائل المظفر...
وبأسمه لايفتخر حتى القرد عده اسم
والعظني كبله انكلب حتى العسل عدى سم
ملتمه ناسه عليه بس موعليه عدسم
...نائل المظفر...
وعافوني كلهم لأن شافوني ماعدي شي
صح اني ماعندي شي ينسرد بس عدي شي
والصفكوا عل شعل ماصفكو عدشي
...نائل المظفر...
ياغيمه عوف المطر ظلي علي ظلي
ماريد اشوف الشمس كبرت علي ظلي
بالدنيا المن اظل بيها شنو ظلي
...نائل المظفر...
خاطر عليه تمن واني احتمل منها
اسنين بحياتي عشت وشحصلت منها
لاحصلت من هلي لاحصلت منها
...نائل المظفر...
ولاحصلتي بشر يدفني حي واندفن