دارميات للشاعر عبد الحسين الحلفي

انت الالي تعنيت وانت الردتني
من دخت كلش بيك راسا عفتني

@ @

تمشي ويه غيري شلون ما اقبل بهاي
ولك انه اغار عليك من تمشي وياي

@ @

ما مره وحدي مشيت من امشي اثنين
لو انت تمشي وياي لو دمعه العين

@ @

ها ناسي ها مليت ها لو قرولك
لو شفت غيري يلوك طوله ويه طولك

@ @

شو ماكو شو ما جيت شو مختلف ليش
ما تدري بالحسرات هدن علي جيش

@ @

يلتسحك اعله الروح عمي ارد اوصيك
اسحكها بس علكيف حته استلذ بيك

@ @

يلكتلي شو مسطور دايخ شتنطر
تغشم بروحك ليش غير انت تسطر

@ @

تكتل حلاه البيك اكفينه شرك
خليت الاعمى يشوف من فلك طرك

@ @

هلكد حلاه حط بيك سبحانه ربك
خلانه مزدحمين دوم اعله دربك

@ @

هلكد حلاه حط بيك سبحانه باريك
جمعلك احله اوصاف وحطهن شلع بيك

@ @

هلكد حلاه حط بيك سبحانه داراك
يمكن قبل هابيل ربك بده وياك

@ @

هلكد حلاه حط بيك سبحانه قادر
بس الحلك موضوع يترس دفاتر

@ @

هلكد حلاه حط بيك سبحانه قدوس
اليبوسك المفروض يتوضى ويبوس

@ @

هلكد حلاه حط بيك سبحانه قيوم
بس اليشبك فاز خيعون الهدوم

@ @

هلكد حلاه حط بيك جلت قدرته
حته اليصلي الليل داخ وسطرته